14 december 2009 - “’t Ogeveine hef beweez’n dat ‘t ‘n
oofdletter U hef, van Umor.” Zo reageerde Hans Jalving
gistermiddeg, bij de uutrieking van de jaorlukse Anfieterpries van
het Nei Dreents Geneutschap. ’t Ogeveine was nomineert, maor greep
naost de pries. Jan Wierenga, warkzaom bij het Dagblad van het
Noorden, gunk er mit vandeur. Emco Dolfing, de darde genomineerde
en wetholder in Midd’n-Drenthe, had ok ’t naokiek’n.
Hans Jalving: “Nao het winnen van de Zoorholtpries veurig jaor hef
dizze gemiente de uutdaging oppakt. Ze holdt rekening met de
schriefwieze van de gemientenaom in het Drèents, twei wetholders
gebruukt het met regelmaot en een raodslid schref een paor keer in
’t jaor een Drèentstaolige column in de kraant. Ok hebt ze twei
mega-O’s van ’t Ogeveine boo’m op ’t dak ezet van de
Tamboer.”
Veurig jaor kreeg ‘t Ogeveine nog de Zoorholtpries um ’t negeer’n
van de streektaol in de campagneslogan HOOGEVEEN. MET EEN
HOOFDLETTER H. Bert Hansma nam naomens de gemiente ’t Ogeveine
zundag de oorkonde veur de nominaotie in ontvaangst. Hansma (warkt
veur ‘marketing Hoogeveen’): De Zoorholpries hef ons anfietert nog
meer op ’t Dreins te lett’n. Dat deu’n wej al natuurlijk, want die
O’s van ’t Ogeveine staot al tied’n op De Tamboer.“
Hansma wees ok nog op de vertaoling die Albert Metselaar van de
marketingtekste van ’t Ogeveine dit veurjaor ef emaakt: Gezonde
reurigheid, aait bèter willn krieng en goed wark oflèvern. Dat is
’t Ogeveine. (Vertaoling van: Dynamiek, ambitie en kwaliteit. Dat
is Hoogeveen.) De tekste giet nog wieder hieronder.
Meer weet’n? Kiek bij Huus van de taol en RTV Drenthe.
Gezonde reurigheid, aait
bèter willn krieng en goed wark oflèvern. Dat is ’t Ogeveine.
’t Ogeveine hef gezonde reurigheid. In de plekke zölf en in de
dorpn broest het van wat er allemaole te doen is. Kuunst, cultuur,
muziek, grote sportwedstriedn: het is der allemaole en het wordt
aait bèter.
d’Ogeveiners wilt aait warkn an die verbètering. De ondernemers
koomt veuruut mit de bedriem. De bevolking is der aait bij as der
wat in de buurte mut gebeurn.
’t Ogeveine, daor valt wat an op. Hier mark ie de kracht van een
grote plekke, de ontspanning van mèensn onder menaar en de
ontspanning van het mooie Drenthe.
Gezonde reurigheid, aait bèter willn krieng en goed wark oflèvern,
dat komp bij menaar in ding as de Ronde van Drenthe, de
Cascadeloop, het iesplein en het internationale Univé
Schaaktoernooi. En wat dèenk ie van het mooie
theater/congrescentrum De Tamboer en van de bioscoop Luxor, waor
iederiene aover prat.
’t Ogeveine wordt niet veur niks mit een eufdletter ‘A’ eschreem.
Aj meer wilt weetn kuj dat vienn op www.hoogeveenmeteenhoofdletterh.nl.